Џиновската кула, која требаше да биде висока помеѓу 1.000 и 1.300 метри, беше планирана да се заврши за Светскиот саем во Дубаи во 2020 година
Пред четири години, официјални претставници на Обединетите Арапски Емирати гордо најавија изградба на кулата Крик Дубаи, која требаше да стане највисоката зграда во светот.
Планираната висина на Дубаи Крик Тауер би ја престигнала соседната Бурџ Калифа, која со своите 828 метри гордо ја држи титулата за највисока зграда во светот за многу децении.
Но, наместо да добие Арапскиот полуостров „Ајфеловата кула на 21-от век“ (да се потсетиме, кулата што доминира во панорамата на Париз е изградена за Светскиот саем во 1889 година), нејзината изградба нагло престана веднаш откако започна работата на темелите.
Реномиран портал за големи инфраструктурни проекти Б1М во кратко видео анализира зошто имало застој и зошто на проектот му се заканува целосен неуспех.
За почеток, според Б1М, кулата која би чинела повеќе од милијарда долари не би понудила премногу корисен простор и покрај нејзината висина. Имено, биле планирани само 20 ката за употреба – во нив би се сместиле хотел, ресторан и неколку места за гледање (видиковци).
Но, изградбата на станбен и деловен простор не беше ни мотивација на Емиратите да ја изградат оваа кула. Имено, нивната прва цел беше да ја задржат титулата „највисока структура во светот“ во Дубаи. Во времето кога беше објавена изградбата на Дубаи Крик кулата, се чинеше дека титулата на Бурџ Калифа – може да ја одземе нов облакодер што се гради во близина на Саудиска Арабија – кулата Џедах. Таа зграда требаше да биде висока нешто повеќе од 1 милја.
Во тоа време, губењето на титулата највисока структура во светот не беше опција за Дубаи. Имено, Бурџ Калифа стана симбол на градот за многу кратко време и е една од причините зошто повеќе од 20 милиони туристи доаѓаат во Дубаи секоја година за да потрошат околу 30 милијарди долари.
Затоа Дубаи Крик, заклучува Б1М, е дизајниран како еден вид полиса за осигурување за Дубаи – во случај Саудиска Арабија да изгради облакодер висок километар, тие наскоро ќе имаат повисока структура без да треба да изградат цел облакодер, туку „само“ кула. Нивната намера е видлива и поради тоа никогаш не ја објавуваат точната висина на кулата Крик во Дубаи, чии инвеститори очигледно чекаа да видат до која точка Кулата Џедах ќе се издигне над земјата.
Но, на почетокот на 2018 година, работата на саудиската мега-кула запре откако клучните финансиери на проектот беа вклучени во големата чистка што ја спроведе принцот престолонаследник Мухамед бин Салман. Од тогаш поминаа повеќе од две и пол години, а работата на кулата Џедах сè уште трае. Некаде во исто време, работата запре и во кулата Крик во Дубаи.
Целиот проект само формално беше ставен во мирување оваа година, и иако инвеститорот „ЕМААР“ сепак тврди дека кулата ќе биде готова во 2022 година, прашање е дали тоа навистина ќе се случи.
