Превозникот „Дурмо турс“ добил тендер за превоз на ученици, само два дена по страшната сообраќајка кај Ласкарци, објави Истражувачката репортерска лабораторија (ИРЛ). Договорот е склучен на 15 февруари, а вчера е објавен на интернет страната на Јавни набавки. Вкупната сума на тендерот со ДДВ е 27.600 евра.
Тендерот бил објавен од средното училиште „Неготино“ од селото Неготино во Општина Врапчиште, а „Дурмо турс“ била одбрана во конкуренција со уште една фирма.
Како што пишувало во договорот, „Дурмо турс“ од 15 февруари до 31 декември ќе ги превезува средношколците од шест села од дома до училиштето и обратно. Критериум за добивање на договорот била најниска цена.
Според податоците на Јавни набавки, „Дурмо турс“ понудила цена од 700 денари, а конкурентската фирма 3.300 денари.
Судија на претходна постапка пред неколку недели изрече мерка притвор за прво и второосомничените за несреќата кај Ласкарци, односно за Дурмиш Белули, сопственикот на “Дурмо Турс” и раководителот вработен во неговата фирма.
Скопското обвинителство покрена истрага вкупно против седум лица како одговорни за катастрофалната несреќа во која животот го загубија 15 патници.
