По историскиот успех на Тамара Тодевска и „Горда“ на евровизискиот натпревар во Израел, таа како вистински победник беше пречекана на скопскиот аеродром.
Видно возбудени, но и изненадени од срдечниот пречек насмевките на задоволство и изненадуавње на се симнуваа од лицата на тимот кој на Македонија и го донесе истористиот пласман, а малку недостасуваше и победа доколку имаше повеќе поени од телевоутингот, но…
„Среќна сум што сите бевме обединети изминативе денови и што ве направив горди“, кажа Тамара Тодевска по пристигнувањето во Скопје.
Тамара и нејзиниот евровизиски тим на аеродромот ја пречекаа стотина граѓани, семејството и владина делегација во која беа министерката за труд и социјална политика Мила Царовска и заменик-министерот за култура Владимир Лазовски.
„Ви благодарам. Тоа што го видовте на евровисискиот настап е резултат на тимска работа, посветеност и љубов. Во финалето ни стана јасно дека сѐ вредеше. Многу сум среќна што направивме добар резултат иако искрено очекувавме повеќе“, рече Тамара по пристигнувањето на Скопскиот аеродром и ја запеа евровизиската песна.
Авионот со кој Тамара и нејзиниот тим слета во Скопје од Тел Авив доцнеше неколку часа, поради силниот јужен ветер. Тамара им се извини на присутните за доцнењето и им рече „не беше наша вина што доцневме“.
Во кратка изјава за медиумите Тамара раскажа како ги доживеала оние неколку мигови кога беше на прво место во гласовите од жирито.
-Како се редеа дванаесетките се гледавме меѓу себе и си викавме „што направивме“. Беше неизвесно. Криво ми е за тие два бода, поради што првото место од жири го испуштивме. Но не е битно, никој не доминираше повеќе од нас на оваа Евровизија. 45 мин бевме први, секој три минути не покажуваа нас, се осеќаме како победници – рече Тамара.
Коментирајќи ја медиумската покриеност таа изрази благодарност за сите што и дале поддршка и додаде дека „прв пат во животот Цеца и Јелена Карлеуша се сложија во нешто“ за нејзиниот настап.
На евровизиското финале Македонија се пласираше на осмото место, што е најголем успех досега. По гласањето на жирото Тамара беше на второ место со само 2. поена зад Шведска, а речиси до самиот крај беше на врвот на табелта. На крајот, по гласовите на публиката со скромни 58 бода, заврши на осмото место.
Придружни вокали на Тамара беа Антониа Гиговска, Александра Јанева и Васил Гарванлиев. „Горда“ е дело на Роберт Билбилов, Лазар Цветковски и Дарко Димитров, автори на музиката и аранжманот , а текстот го напишаа Коста Петров и Сања Поповска. Спотот го режираше Чедо Поповски.
