„The world“ е името на новиот тематски забавен парк, што ќе биде изграден на местото на стариот Луна Парк, а според проценките ќе биде пуштен во употреба до средината на следната година.
Денеска во Град Скопје беа презентирани содржините на тематскиот парк од страна на градоначалникот Петре Шилегов и од проектантот и архитект, Франко Бараѕони, претставник на италијанската компанија на Баусаа, коишто ги изработија и се донатори на студијата и планот за изградба.
Новиот забавен парк ќе опфаќа најсовремени реквизити кои ќе им нудат забава на сите посетители без оглед на нивната возраст.
Проектирано е во паркот да има 3 зони- детска, фамилијарна и адреналинска зона, во кои ќе се постават 24 различни реквизити и содржини.
Самиот парк ќе се протега на истата површина како и досега, а сите реквизити во паркот ќе се поставуваат, односно лоцираат, според постојните дрвја на парцелата.
Забавниот парк ќе се простира на околу 26.000 квадратни метри.
Цената на билетите се уште не е позната, но како што беше најавено ќе биде достапна за сите.
