Невремето, иако беше најавено, сепак не изненади бидејќи никогаш не можете добро да се подготвите за моќта на природата…
Под влијание на нов изразен влажен воздушен бран за време на викендот и тоа особено во сабота навечер и во текот на ноќта кон недела како и во недела се очекуваат нови поинтензивни врнежи од дожд ( локално над 30 л/м2). Секако се очекува и локален развој на нестабилна облачност проследена со обилен пороен дожд, електрични празнења, засилен до силен ветер како и со услови за појава на град. Токму поради оваа ситуација граѓаните да бидат внимателни, а поради поинтензивните врнежи можни се и локални поплавувања, предупредува Славчо Попоски.
Влијанието на посвежата воздушна маса од север понатаму кај нас ќе условува подпросечни температури на воздухот за овој дел од годината, па така истите на повеќе места ќе останат под 30. степени, а наутро најниските температури понекаде се очекува да се спуштат и под 10. степени.
Инаку, пред два дена преспанскиот регион и поголемиот дел од Македонија ги зафати страшно невреме.
„Само на филм имам видено такво невреме какво што вчера се случи во преспанскиот крај. Едвај спасивме жива глава“. Вака сведочи Славчо Глигоровски за 1ТВ кој е сопственик на камп приколка врз која се урнало дрво и ја срамнило со земја.
Тој, неговата сопруга и двајца нивни пријатели биле затворени внатре и не можеле да ја отворат вратата од силниот ветер и градот.
-Среќа што бевме на другата страна кога падна дрвото врз приколката вели Глигоровски. Со еден збор беше страшно, сведочат овдешнитe посетители и жители.
Порталот Центар дојде и до видео од силното невреме кое синоќа пустошеше во Преспа, направено во Штрбово
https://www.youtube.com/watch?time_continue=20&v=ZH-c4FyOXtU.
Надлежните служби започнаа со расчистување на теренот во Преспа и проценки на штетите на овошките, по големото невреме проследено со силен дожд и врнежи кое го зафати регионот на Долна Преспа, општина Ресен, каде најпогодени се селата Крани, Долно Дупени, Љубојно, Наколец, Стење, Претор и Штрбово.
Оштетени се покриви, автомобили, од паднати дрвја во авто-кампот „Крани“ оштетени се камп-приколки, паднатите дрвја ги препречиле некои од локалните патни правци, а има и штети на овоштарници и други култури. Невремето предизвика и оштетување и на електричната мрежа.
Министерот за внатрешни работи Оливер Спасовски и министерот за земјоделство, Трајан Димковски, заедно со градоначалникот на општина Ресен, Живко Гошаревски, денеска ги посетија населените места во Преспанскиот регион што беа погодени од вчерашното невреме.
Спасовски изјави дека веднаш се преземени мерки за да се заштитат животите на луѓето и активирани се сите владини и локални служби со цел побрзо да се санира состојбата.
– Владата ќе ги ангажира сите можни капацитети, од една страна да се проценат штетите дали се тоа на земјоделски производи или објекти, да видиме колкава е штетата, и од друга страна што побрзо да се санираат штетите – изјави министерот Спасовски.
