Топло, но нестабилно време со пороен дожд, најавува УХМР за денеска попладне и утре. Во недела и понеделник ќе преовладува сончево и топло време со мала до умерена облачност.
Температурата денеска ќе достигне максимални 33 степени. Во деновите од викендот ќе достигне 36, а во понеделник 38 степени.
Од вторник ќе биде ветровито со услови за локален пороен дожд. Дневните температури ќе бидат во интервал од 27 до 36 степени.
Метеорологот Славчо Попоски пак, излезе со детална анализа на времето во август. Еве што не очекува:
Почитувани, со оглед на тоа дека многу од вас заминуваат и ги користат своите годишни одмори во новиот месец кој ни доаѓа полека, а тоа е август, ние решивме да издадеме подолгорочна метео прогноза токму за истиот месец и што може да очекуваме од времето кај нас, но и пошироко во регионот:
Во текот на август, барем според моменталните анализи со кој ние располагаме, кај нас очекуваме температурите да бидат малку под просекот за тој дел од годината, односно да биде малку посвежо иако повремено се очекуваат и бранови од северните предели на Африка, но некој екстремно топли бранови со температури од преку 40 степени засега нема на видик ниту во месец август, информира метеорологот Славчо Попоски.
Врнежите пак ќе бидат нешто над просекот, што значи очекуваме нешто повеќе врнежи и повеќе дестабилизации на атмосферата, секако во ваква ситуација и понатаму се можни нови невремиња.
Посвежо од нормалата треба да биде и во регионот и тоа особено во Бугарија и во Грција како и на југот од Србија, исто така и во овие делови се очекуваат повеќе врнежи од вообичаеното.
За многу подетални и обновени метео информации понатаму а особено треба да се следат оние пократкорочни анализи кој ги издаваме и истите се далеку попрецизни.
