29-годишната Меван Бабакар допрела до срцето на корисниците на Твитер кога ја споделила приказната за топлиот гест на еден добар човек кој ѝ ги развеселил тешките бегалски денови, кога таа имала само 5 години. Меван во 90-тите живеела во бегалски логор во Холандија, а еден од волонтерите бил толку великодушен што ѝ купил велосипед. Сега, кога Бабакар пораснала, таа го побарала преку социјалните мрежи.
“Здраво интернет, знам дека шансите ми се мали, но: 5 години бев бегалка во текот на 90-тите и овој човек, кој работеше во бегалски камп во близина на Зволе, Холандија, ми купи велосипед. Моето 5-годишно срце експлодираше од радост. Сакам да го знам неговото име. Може ли да ми помогнете?”, стои во нејзината објава, во која приложила и фотографија од човекот која таа и нејзината мајка ја понеле заедно со уште неколку работи од бегалскиот логор.
Hi internet, this is a longshot BUT I was a refugee for 5 yrs in the 90s and this man, who worked at a refugee camp near Zwolle in the Netherlands, out of the kindness of his own heart bought me a bike. My five year old heart exploded with joy. I just want to know his name. Help? pic.twitter.com/XzUgHzllYb
— Mevan | میڤان (@MeAndVan) August 12, 2019
Бидејќи не можела да се сети на неговото име, Меван мислела дека нејзината потрага ќе биде залудна. Меѓутоа, по 3.000 споделувања и неколку новински написи, Меван се сретнала со нејзиниот јунак од детството. Тој се вика Егберт, денес одгледува орхидеи и сè уште им помага на бегалците. Веднаш се сетил на Меван и нејзината мајка, но ги замолил новинарите да не му го објавуваат презимето поради приватност. Тој се сретнал со девојката во Холандија, а средбата била многу емотивна.
Бабакар вели дека велосипедот кој го добила од Егберт и неговото добро дело ѝ помогнале да израсне во личност каква што е денес и повторно да се чувствува вредно. “Се сеќавам дека се чувствував многу посебно. Се сеќавам дека помислив дека велосипедот е огромна работа која треба да ја примам и се прашував дали воопшто вредам за таквите работи. Тоа чувство стана основа на моето растење”, вели таа. Екипата на Твитер ја прогласила приказната за најубава оваа година.
