Лидерите на ЕУ на самитот во Брисел со часови бараат заеднички јазик кога станува збор за отворање на пристапните преговори со Македонија и Албанија.
Дипломатски извори наведуваат дека земјите членки се обидуваат да дојдат до заеднички текст на заклучоци со кој би се испратила позитивна порака до земјите кандидатки, но не и зелено светло за старт на пристапните преговори.
Разговорите на ЕУ лидерите за проширување и процес на пристапување во Унијата почнаа нешто после седум часот вечерта, а заеднички став немало ниту после полноќ, пренесува Танјуг.
Од друга страна пак Дојче веле цитирајќи висок француски дипломат пренедува дека Париз има ново барање за Македонија а тоа е во следните шест месеци Скопје да спроведе дополнителни реформи за да одобри почеток на преговорите.
Сепак, не се посочува за какви реформи се работи.
Од друга страна голем број на земји од ЕУ веруваат дека пристапните преговори треба да започнат и со Албанија и со Македонија, група на земји, вклучително и Холандија, Данска и Шпанија, се за започнување преговори само со Скопје, велат извори на средбата.
Во исто време, Франција, Италија и Германија ја отфрлаат идејата за раздвојување на почетокот на разговорите на Тирана и Скопје.
Покрај тоа што се спротивставува на започнувањето на преговорите со двете држави, Франција е и за промена на методологијата на пристапниот процес.
Извори на Европскиот совет велат дека пред сè, Франција, Германија, Холандија и Данска се обидуваат да го усогласат текстот што ќе ги одложи разговорите за пристапување на Албанија и Северна Македонија во 2020 година, но исто така ќе се обидат да ги „охрабрат“ двете држави.
Прашањето за проширувањето беше првата точка на разговор на лидерите за време на вечерата во Брисел, веднаш по донесувањето на договорот за Брегзит.
Претседателот на Европскиот совет, Доналд Туск, го додаде ова прашање на агендата на самитот на ЕУ по неуспехот на европските министри да постигнат консензус за нови чекори во пристапниот процес на Скопје и Тирана.
Финското претседателство на ЕУ соопшти дека државите членки ги разгледале сите можни опции, вклучително и одвојување на почетокот на пристапните преговори со Северна Македонија и Албанија, со цел да се постигне напредок.
Во оваа прилика, Франција остана во став дека ниту една земја не ги исполнила условите за почеток на преговорите, но и дека целиот процес на пристапување треба да се реформира пред да може да се продолжи интеграцијата на земјите што сакаат да станат нови членки на Унијата.
