Личните предмети, кои некогаш и припаѓале на легендарната комичарка Бети Вајт, вклучувајќи го и златниот часовник на нејзината мајка, треба да се најдат на аукција во септември.
Наградите, сликите, сценаријата, накитот и облеката носени на црвениот тепих на актерката од „Golden Girls“ се изложени во аукциската куќа Julien’s Auctions во Беверли Хилс.
„Ова е аукција која претставува неверојатен живот и кариера. Тоа е аукција на начин на живот. Сите тие предмети дојдоа од нејзиниот дом во Брентвуд или од нејзината резиденција во Кармел, Северна Калифорнија, каде што живееше со нејзиниот сопруг Ален Луден“, рече Мартин Нолан, извршен директор на Julien’s Auctions.
Најличен предмет, според Нолан, е „часовник од 14 каратно злато, кој и бил даден на Бети на 25 декември 1940 година, со иницијали T.C.W., што е, се разбира, Тес Вајт, мајката на Бети“.
Вајт ја започна својата кариера во радио во доцните 1930-ти, а во 1939 година го имаше своето телевизиско деби.
Таа беше една од првите луѓе кои добија ѕвезда на Булеварот на славните во 1960 година. Помала реплика, која се доделува на примачот кога ќе му биде доделена ѕвезда, ќе биде продадена на аукција.
Има и бројни слики со животински мотиви.
„Милениците беа нејзина работа. Таа рече дека ја сака својата работа во шоу-бизнисот за да може да го финансира својот бизнис со животни“, рече Нолан.
На аукцијата има три слики – дела на Коко, горила која комуницирала на знаковен јазик.
Нолан ја проценува целата колекција на еден до два милиони долари. Аукцијата ќе се одржи во септември во Беверли Хилс.
