Најостро го осудуваме потегот на нашата претставничка на „Песна за Евровизија 2022“, Андреа Коевска, којашто за време на фотографирањето во Торино го фрли на земја државното знаме, соопшти Македонската радио телевизија (МРТ).
– Јавниот сервис на ниту еден начин не стои зад ваквото скандалозно однесување на нашата евровизиска претставничка, која со тој гест покажа непочитување кон националното обележје, што е казниво со закон, се наведува во соопштението.
МРТ очекува од Андреа да им се извини на граѓаните за ваквото однесување и најавува дека ја разгледува можноста за нејзино повлекување од Евровизија, иако ќе се води сметка да не се предизвика поголема штета по јавниот сервис.
– Против одговорните во македонската делегација ќе бидат преземени сите законски можности за најстрого санкционирање за овој скандал, се додава во соопштението.
Во меѓувреме Андреа се извини за случувањето и објасни дека тоа не го направила од омраза туку затоа што во еден момент и побарале фотографија без знамето а делегацијата била подалеку од неа и не можела да им го даде, па решила да го фрли.
Таа вели со денови наназад гордо го покажува и носи македонското знаме и не и се верува што се случува сега.
