Според календарот на МПЦ (Јулијанскиот календар) денеска е 24 март.
Преподобен Захарија
Син на Карион Египќанецот, којшто ги остави жената и децата и се замонаши, само синот Захарија го зеде со себе, бидејќи мајка му не можеше да го прехрани. Иако многу помлад од многумина старци во Скитот, Захарија се здоби со многу поголеми благодатни дарови од многумина меѓу оние старци. Од благодатта Божја чувствуваше како му гори целата внатрешност. На прашањето на свети Макариј кој е вистински монах, Захарија одговори: „Оној којшто непрестано се принудува себеси на заповедите Божји“. А на прашањето на авва Мојсеј што значи да се биде монах, Захарија ја симна камилавката, ја изгази со нозете, па рече: „Ако човекот не се смири и понизи себеси, не може да биде монах!“ Беше големо светило меѓу монасите во пустината и млад се упокои во Господ.
Свети Артемон, епископ Селевкиски
Роден и воспитан во Селевкија. Кога светиот апостол Павле дојде во тој град, го сретна Артемон, уште повеќе го утврди во верата во Христа и го постави за епископ на Селевкија. Артемон управуваше со словесното стадо Христово со љубов и со ревност, беше лекар на човечките души и тела и во вечноста се пресели во длабока старост.
Спомен на чудото во Печерскиот манастир
Двајца другари, Јован и Сергиј, се побратимија пред иконата на Пресвета Богородица во овој манастир. Јован беше богат човек и имаше петгодишен син Захарија. Јован се разболе и пред смртта својот син го предаде на старателство кај Сергиј, на кого што му остави на чување прилично количество злато и сребро, со тоа што тоа требаше да му биде врачено на Захарија кога ќе порасне. Но, кога порасна Захарија, Сергиј одрече дека примил било што од умрениот Јован. Тогаш Захарија му побара да се заколне пред истата онаа икона на Пресвета Богородица пред којашто влезе во братство со неговиот покоен татко Јован, а вети дека потоа тој не би барал од него ништо. Сергиј се согласи. Но, кога се заколна, сакаше да пријде да ја целива иконата, само што некоја сила го држеше на растојание и не му допушташе. Тогаш почна бесомачно да вика: „Свети отци, Антониј и Теодосиј, не пуштајте да ме погуби овој немилосрден ангел!“ По Божјо допуштение беше нападнат од демонот. По ова Сергиј му ги покажа на Јовановиот син сите пари што ги наследи од таткото. Кога отворија пак, ја најдоа онаа сума удвоена, како што по Божја Промисла се имаше удвоено сама од себе. Штом ги прими парите Захарија му ги даде на манастирот, а самиот таму се потстрижа за монах, проживеа долго и се удостои со големи духовни дарови. Мирно се упокои во Господ.
Преподобен Јаков Исповедник
Беше монах на Студитскиот манастир. Пострада заради иконите од царот Лав Ерменин. Кога великиот Теодор Студит беше во ропство, Јаков го фрлија во големи маки за да се одрече од иконопочитувањето. Но, тој остана истраен и верен на Православието докрај. Избиен и измачен го вратија назад во манастирот, а злобниот цар го снајде зол крај на животот. Преподобниот Јаков умре во манастирот од тешките повреди стекнати при страдањето.
Светиот свештеномаченик Партениј, патријарх Цариградски
Родум од островот Митилина. Подолго време беше епископ на островот Хиос. Потоа го избраа за патријарх. Заради извесни лажни достави дека работи против државата, Турците прво му нудеа да се потурчи, а кога тој одлучно ги одби, го обесија во 1657 година.
