„Шоуто на Елен Деџенерис“ кое ги забавуваше Американците, кршеше стереотипи и беше домаќин на најголемите ѕвезди, завршува во сенка на обвинувања по речиси две децении, 19 сезони и повеќе од 3.000 епизоди.
Најголемите холивудски ѕвезди често гостуваа во нејзиното ток-шоу, кое се здоби со популарност во поконзервативните делови на Америка. Нејзина прва гостинка беше актерката Џенифер Анистон, која исто така ќе се појави во финалето.
По нејзиниот успех како комичар во 1980-тите, Деџенерис се прослави со серијата „Елен“ (1994-1998), во која во 1997 година стана првиот главен лик на ТВ серија што ја призна својата ориентација и популарното ток-шоу кое почна да го води во 2003 година.
„Таа го отвори патот. Таа веројатно беше, а можеби и сè уште е, најпознатата ЛГБТ личност во Америка“, изјави за AFP Мери Марфи, вонреден професор по новинарство на Универзитетот во Јужна Калифорнија.
Таа го водеше ток-шоуто 19 години.
„Кога го започнавме шоуто во 2003 година, социјалните мрежи не постоеја. Истополовите бракови не беа легални“, изјави Деџенерис минатиот месец по снимањето на последната епизода од серијата, која ќе се емитува денес.
„Гледавме како се менува светот – понекогаш на подобро, понекогаш не“, додаде таа.
Водителката и комичарка објасни дека ток-шоуто е откажано бидејќи повеќе не и е предизвик, но многумина сметаат дека вистинската причина се обвинувањата за „токсична работна атмосфера“ на сетот, вклучувајќи вознемирување и расизам.
Во јули, главните продуценти на серијата изјавија дека средината во која се снима шоуто е „лоша“. Елен Деџенерис не беше директно обвинета, но беше прекорена што дозволила да се создаде таква средина во нејзиниот тим.
