Голем број граѓани се уште не добиле поврат на 15% од ДДВ. Министерката за финансии уверува дека сите ќе ги добијат парите на трансакциска сметка. И покрај тоа што граѓаните негодуваат затоа што дел од нив мислат дека за џабе скенирале сметки со месеци, Ангеловска вели дека УЈП има голем број корисници на кои треба да им префрли пари, а дел од луѓето имале грешка во пријавените трансакциски сметки. Од УЈП иако првично рекоа дека исплатата за првото тримесечје ќе заврши заклучно до денеска, сега си дадоа простор тоа да го сторат до крајот на месецов. Поврат на ДДВ бил исплатен кај над 50 проценти од корисниците на МојДДВ.
Наградната игра „Мој ДДВ, моја награда“ која ќе трае една година ќе стартува за два дена. Министерката одговори и на обвинувањата дека оваа наградна игра е копија на онаа на претходната Влада „Фискална во рака, награда без мака“. Вели за разлика од претходно, оваа наградна игра имала едукативна функција, односно граѓаните сами ги пријавувале неправилностите и фирмите дел од сивата економија.
Вкупниот награден фонд изнесува половина милион евра. Сите што ги исполнуваат условите можат да добијат една од 3.852 награди. Секој ден ќе се доделуваат по 10 награди, во вредност од 1000 до 3.000 денари. Еднаш месечно ќе се делат 15 награди по 100 илјади денари. Предвидени се и две премии од по 3 милиони денари.
