Предлози за издавање казнени налози против три физички и едно правно лице за кривично дело – Непостапување според здравствените прописи за време на моменталната ситуација од член 206 од Кривичниот законик поднесе Основното јавно обвинителство Скопје.
Татко и син од Скопје се првите двајца обвинети, на 13 септември во дворот на семејната куќа организирале приватен собир – веридба, на која присуствувале 30 гости. Со ова тие постапиле спротивно на прописите и наредбите со кои се определни мерки за спречување на ширењето на болест, согласно кои се забранува одржување на масовни собири и настани на отворен и затворен простор.
Третиот обвинет, како основач и управител на обвинетото правно лице – угостителски објект, на 3 октомври, постапил спротивно на забраната за организирање прослави – свадби во отворениот и затворениот дел од објектот и на Протоколот за отворање и работа на угостителските објекти за исхрана. Тој во објектот дозволил да се организира настан – свадба на која биле присутни околу 90 лица, со што го довел во опасност животот и здравјето на луѓето. Настанот бил утврден при контрола и надзор од страна на овластени лица од Државниот пазарен инспекторат.
Предложени беа парични казни од 100 дневни глоби со поединечна вредност на дневната глоба од 20 евра во денарска противвредност. За обвинетото правно лице, пак, на Основниот кривичен суд му е предложено да изрече парична казна од 300.000 денари.
