Министерството за труд и социјална политика соопшти дека 14 јуни, петок пред Духовден, е неработен ден за граѓаните од православна вероисповед во Република Македонија.
Духовден или Дуовден — еден од најголемите 12 христијански празници. Се нарекува уште и Педесетница (грчки: πεντηκοστή, латински: pentecoste) и е еден од најрадосните и најсветли празници во христијанството во кој се слави слегувањето на Светиот Дух врз апостолите на педесеттиот ден од Христовото воскресение.
Овој настан претставува исполнување на старозаветните месијански пророштва. Овој празник како и Велигден се празнува три дена. Во црногорското и хрватското приморје овие денови се нарекуваат и Русаље или Русаљи, а во Македонија и кај останатите Јужни Словени со православна вероисповед првиот ден од Духовден е и ден на Св. Троица.
Ова се неработните денови до крајот на годината:
За сите граѓани на РМ: 04 јуни (вторник), Рамазан Бајрам, првиот ден на Рамазан Бајрам, 02 август (петок), Ден на Републиката, 08 септември (недела), Ден на независноста, односно 09 септември (понеделник) е неработен ден, 11 октомври (петок), Ден на народното востание, 23 октомври (среда), Ден на Македонската Револуционерна Борба и 08 декември (недела), „Св. Климент Охридски“ односно 09 декември (понеделник) е неработен ден.
За граѓаните од православна вероисповед: 14 јуни (петок), Духовден, петок пред Духовден и 28 август (среда), Успение на Пресвета Богородица (Голема Богородица). За граѓаните од католичка вероисповед: 01 ноември (петок), Празникот на сите светци и 25 декември (среда), првиот ден на Божик. За граѓаните од муслиманска вероисповед: 11 август (недела), Курбан Бајрам, првиот ден на Курбан Бајрам. За граѓаните припадници на албанската заедница во РМ: 22 ноември (петок), Ден на Албанската азбука. За граѓаните припадници на еврејската заедница во РМ: 09 октомври (среда), Јом Кипур, првиот ден на Јом Кипур. За граѓаните припадници на бошњачката заедница во РМ: 28 септември (сабота), Меѓународен ден на Бошњаците. За граѓаните припадници на турската заедница во РМ: 21 декември (сабота), Ден на настава на турски јазик.
