– Денес времето во Македонија ќе биде сончево и релативно топло со мала до умерена локална облачност. Ќе дува слаб до умерен ветер претежно од југозападен правец. Максималните температури ќе се искачуваат во интервалот од 5 до 14 степени. Во Скопје и околината времето ќе биде сончево и релативно топло со мала локална облачност. Ќе дува слаб ветер од јужен правец, додека максималната температура ќе се искачи до околу 10 степени – вели метео прогнозерот Славчо Попоски.
Потоа под влијание на влажен и студен воздушен бран од север, особено утре попладне и навечер, како и во текот на ноќта кон вторник ќе има врнежи од дожд и снег на планините. Поради спуштање на студен фронт од север, утре во вечерните часови и во текот на ноќта кон вторник врнежите од дожд ќе преминат во врнежи од снег и на некои од пониските места. Ќе започне да дува засилен до СИЛЕН северен ветер, а снежна покривка ќе се формира и на некои пониски места, и тоа особено во западните предели, додека на планините истата ќе се зголемува. Максималните температури утре ќе се искачуваат во интервалот од 4 до 12 степени.
Според Попоски, пониски температури и тоа поради северниот ветер ќе имаме во вторник и истите ќе се искачуваат во интервалот од 0 до 7 степени, а ќе има услови и за локално провејување на снег, особено во планинските предели. Веќе од среда па натаму ќе имаме претежно стабилно, суво и ЗНАЧИТЕЛНО ПОТОПЛО време.
