„Недостигаш“ е насловот на песната која Елена Георгиевска, Матеа Илиева, Викторија Ефтимова, Анастасија Илиевска кои се членови на хорот “Златно Славејче”, ја напишаа и снимија со посвета на нивниот пријател и идол кој долго време беше водител на фестивалот – пејачот и актер Влатко Илиевски.
Песната освен на интернет каналот Јутјуб, се најде и на неколку домашни портали.
Секогаш твоето име ќе го величиме и засекогаш ќе остане врежано во нашите срца. Со тебе пораснавме, се дружевме, а сега те нема… Ќе се потрудиме да го зачуваме твоето дело и никогаш да не бидеш заборавен! – напишаа девојчињата во описот на објавената снимка.
Благодароност до девојчињата кои не го заборавија Влатче изрази и неговиот татко Драган Илиевски –Вршац, кој меѓудругото откри една шокантна информиција – токму оваа песна била одбиена за изведба на неодамна одржаната „Златна бубамара“, со образложение дека не се вклопува во сценариото!
Овие прекрасни девојчиња кои од љубов детска искрена ја снимија песната сакајќи да ја испеат на „Бубамара“ биле одбиени со образложение дека не се вклопува во сценариото. Морав ова да го објавам, а на Вас почитувани го оставам коментарот, пишува таткото на Влатко.
Коментарите под објавата не изостанаа, а дел од фановите на пејачот пишуваат:
Даваат внимание на пејачи од екс – Ју, нам на повеќето непознати, а нашите се запоставуваат- срамота! Влатко ќе биде секогаш во нашите срца.
До таткото на Илиевски се обратија и родителите на девојчињата кои ја создадоа песната и на неговиот профил на социјалната мрежа Фејсбук објавија благодарност за тоа што ги поддржал да ја снимаат и сподалат со јавноста песната „Недостигаш“.
Најогромно благодарам за Вас Драган Илиевски- Врашац за максималната поддршка што им ја дадовте на нашите деца оваа песна да ја споделат со јавноста и да ги користат сликите од Влатче. Тој засекогаш ќе остане во нашите срца, гласи коментарот на еден родител.
Благодарам и од мене почитуван. Јас како родител на учесник во песната се гордеам бидејќи оваа храброст е реткост, пишува друг родител.
Инаку, на 22-та „Златна Бубамара“, македонскиот шоумен Игор Џамбазов ја потсети публиката на оние кои ја напуштија животната сцена во 2018 година, а меѓу нив ги спомена Ванчо Петрушевски, Мите Грозданов и Горан Стефановски, не беше заборавен ниту Влатко Илиевски.
Вистина.мк
