Кратко траеше впечатокот дека Кристијано Роналдо го сменил своето однесување и повеќе не е самобендисан и арогантен.
Во својата изјава во пресрет на првиот натпревар од Лигата на шампионите, тој повторно се осврна на тоа дека е подобар играч од Лионел Меси и дека треба да има повеќе индивидуални признанија.
„Би се радувал на повеќе Златни топки и мислам дека ги заслужувам. Меси е фантастичен човек, фантастичен фудбалер, но мислам дека треба да имам 6,7, 8 Златни топки и да бидам пред него“, изјави Роналдо.
Досега во кариерата тој освои пет Златни топки, исто колку и Меси иако во меѓусебните дуели Аргентинецот е далеку подобар од него. За време на деветте сезони во Шпанија, Меси со Барса освои шест, а Роналдо со Реал само две шампионски титули. Во единствената пресметка во Лигата на шампионите, во 2011 година подобар беше Меси кој со својата екипа победи со вкупен резултат од 3-1, а тој ги постигна двата гола на Бернабе во првиот меч.
