Светскиот рекет број еден, Новак Ѓоковиќ, пристигна во Австралија, но не доби виза за престој во земјата. Регионалната влада на државата Викторија го одбила повикот на граничните власти да го поддржи издавањето на виза за најдобриот светски тенисер.
Како што се наведува, властите посочуваат дека тимот на Ѓоковиќ испратил погрешен формулар за издавање на виза. Ѓоковиќ има виза со која не може да влезе како неимунизиран и покрај медицинското ослободување од обврската.
Наводно, граничните служби ја повикале владата на Викторија да го одобри влезот на Ѓоковиќ, но од таму одбиле.
Тој пристигнал на аеродромот околу 13.30 часот по овдешно време и засега не може да влезе во земјата, па чека да се разреши ситуацијата со формуларот.
Во Австралија сега е полноќ и е прашање колку српскиот тенисер ќе треба да чека за да се разреши целата ситуација.
Претходно, австралискиот премиер, Скот Морисон, најави дека тенисерот при влезот ќе мора да докаже дека има медицинско оправдување поради кое не е имунизиран против болеста, што го добил автентично, или ќе биде испратен дома со првиот авион.
Вчера, една од најважните вести во светот на спортот беше дека Ѓоковиќ ќе ја брани титулата во Мелбурн, бидејќи добил медицинска дозвола од австралиските власти неимунизиран да настапи на Австралија опен.
