Со песната „Circles“ Андреа Коевска вечерва ќе ја претставува Македонија на втората полуфинална вечер од годинешното издание на Евровизија кое се одржува во Торино, Италија.
Од самиот старт Македонија е на дното кога се во прашање шансите за победа или влез во финале.
И натаму најголеми шанси за победа има Украина, па следуваат Велика Британија и Италија.
Инаку, по скандалот со фрленото знаме МРТ ја разгледуваше можноста за отстранување на нашата претставничка од натпреварот и најавија дека по враќањето од Торино, ќе бидат преземени сите санкции кои се потребни, предвидени со закон.
„Македонската радио телевизија, по инцидентот кој што се случи за време на официјалната церемонија за отворање на Евровизија 2022, кога нашата претставничка Андреа Коевска го фрли македонското знаме на тиркизниот тепих и по првичното Соопштение кое што беше објавено по реакциите на јавноста, детално ги разгледа сите аспекти за евентуалното повлекување на нашата претставничка од Евровизија. Таквиот чекор во момент кога сите рокови за повлекување се поминати би предизвикал голема финансиска штета и други санкции кои што не се за занемарување. Имено, со откажувањето би се загрозилo и учеството и отстапувањето на телевизиските права на сите други настани кои што Јавниот сервис ги добива како членка на Европската радиодуфузна мрежа.
Македонската Радио Телевизија ќе ги преземе сите законски решенија и дисциплински мерки по враќањето на нашата делегација од Торино, откако членовите ќе ги поднесат извештаите за случувањата на церемонијата.
Поради негативниот имиџ во јавноста на проектот „Евровизија“ што предизвикува негативен публицитет на МРТ, Уредничкиот колегиум на МРТ ја разгледува можноста од следната година Македонската радио телевизија веќе да не учествува на Изборот за песна на Евровизија“, велат од МРТ.
