Кризата е во полн ек во цел свет, но соседите вчера имаа друга тема, која целосно ги окупираше сите локални медиуми, и пошироко. И покрај рекордниот пад на БДП под влијание на кризата, хрватските технолошки компании бележат историски успех на глобално ниво.
Сето ова се случи во хрватската економија за само неколку часа. Од една страна, компанијата Нанобит беше продадена на шведскиот гејмерски гигант за импресивна милијарда куни, а покрај тоа, се појави и информација дека компанијата Римац Автомобили е во последната фаза од договорот со групацијата VW во врска со преземањето на Бугати.
Имено, загрепската компанија за игри Нанобит беше продадена на шведската групација „Stillfront“. Набавката, пишува во соопштението, ќе се изврши во две транши. „Stillfront“ најпрво ќе купи 78% од акциите за 100 милиони долари, а подоцна, по две години, ќе го купи остатокот во Нанобит, по цена утврдена од финансиските години 2021 и 2022 година. Вкупната сума што „Stillfront“ ќе ја плати на крајот на трансакцијата ќе биде до 148 милиони долари.
„Stillfront“ е водечка компанија за бесплатни игри што обединува 14 гејмерски студија ширум светот. Тие вработуваат повеќе од 800 работници, а главните пазари се САД, Германија, Средниот исток и Северна Африка, како и Франција и Канада. Седиштето е во Стокхолм и компанијата е наведена на „Насдак“.
Нанобит е основана од Зоран Вучиниќ пред 12 години, а денес компанијата вработува 125 лица кои создаваат игри што биле преземени повеќе од 145 милиони пати. Сега, тие најавуваат дека оваа трансакција ќе им овозможи да добијат дополнителен интензитет што ќе им овозможи да продолжат да растат, развивајќи нови амбициозни планови и проекти. Седиштето на компанијата останува во Загреб.
Покрај ова, пристигна и веста, како што објавија медиумите од регионот дека Хрватот Римац Автомобили ќе го преземе легендарниот Бугати. Наводно, репер треба да биде „ePorsche“, кој веќе има удел во „Rimac“ и чие портфолио веќе ги вклучува сите три брендови на автомобили. Идејата, пишуваат медиумите, е дека Римац ќе стане сопственик на Бугати преку Порше.
