Врз основа на првичните неофицијални резултати од вчерашните предвремени парламентарни избори од обработени 3.421 од вкупно 3.480 избирачки места според симулацијата на пратенички мандати, распоредот на силите во Собранието би бил следен:
СДСМ со коалицијата „Можеме“ ќе има 46 пратеници, коалицијата предводена од ВМРО- ДПМНЕ 44, ДУИ 15, Алијанса за Албанците и Алтернатива 12, Левица 2 и ДПА 1.
Другите девет партии и коалиции учесници на изборите не собрале доволно гласови за да освојат пратенички мандат.
Бројот на гласови оди вака: 324.084 гласа или 36,12 проценти има коалицијата на СДСМ, 312.745 гласа или 34,85 проценти коалицијата на ВМРО-ДПМНЕ, 101.432 гласа или 11,3 проценти има ДУИ, 76.425 гласа или 8,57 проценти гласале за Алијанса за Албанците и Алтернатива, 37.057 гласа или 4,16 проценти за Левица 37.057, и 13.553 гласа или 1,52 проценти за ДПА .
Според ДИК денеска по прибирањето и обработката на сите пристигнати материјали ќе бидатсоопштени првичните резултати од изборите и распределбата на пратеничките мандати.
Правото на глас го искористија околу 923 илјади граѓани или приближно 51 проценти од запишаните гласачи во Избирачкиот список.
