Македонскиот репрезентативец Елиф Елмас константно се поврзува со трансфер во големи европски клубови ова лето.
Пред неколку денови самиот Елмас сподели фотографија од неговиот татко кој престојуваше во Милано, па јасно беше дека по објавата ќе се зголемат шпекулациите за негов евентуален премин во клубовите од овој град.
На прашање на водителот на забавната емисија „Ексклузив“ која се емитува на „1ТВ“, Елмас даде одговор со кој меѓу редови потврди дека неговиот татко, кој му е и агент во Милано престојувал на преговори со некој од клубовите.
– Како што знаете се пишува за Интер и Милан, татко ми како мој менаџер замина таму да види нешто околу преговорите. Ќе видиме што ќе се случи, – кратко одговори Елмас.
За Елиф Елмас се интересираат голем број на клубови, меѓу кои и Атлетико Мадрид, Наполи, Интер и Милан. Пред извесно време Фенербахче доби примамлива понуда од Атлетико Мадрид во која покрај сумата од 14 милиони евра, беше вклучен и напаѓачот Никола Калиниќ.
Сепак најверојатно е дека гигантот од Милано, Интер ќе биде следната дестинација за македонскиот дијамант. Останува да видиме како ќе се движат преговорите.
