Најмалку три лица се повредени на популарното шпанско летувалиште Ибица откако торнадо го опустоши островот.
Силната бура ја погоди познатата туристичка дестинација во Шпанија, донесе обилни дождови и разорни ветрови кои што според шпанската метеоролошка служба, достигнале брзина од 140 километри на час.
Најмалку 200 стебла биле откорнати, а ветрот носел сѐ пред себе, од чадори за сонце, до делови од куќи, крајбрежни објекти и слично. Исто така, биле забележани бранови од 4 метри кои што предизвикале помала материјална штета.
Сведоците за шпанските медиуми раскажуваат дека бурата се подготвувала околу еден час, по што неверојатно се стемнило и започнале силните дождови и налети на ветер.
„Најсилниот удар траеше околу 4 минути. Тогаш сфатив дека станува збор за торнадо, а исто така и забележав дека многу дрвја се откорнати“, изјави туристката Софи Кели за локалните медиуми.
Локалните служби започнаа со чистење на улиците, но многу туристи сепак одлучиле да ги напуштат хотелите и да си заминат дома.
